Tuesday, Sep 22 2020 | Time 05:58 Hrs(IST)
business economy Share

ಹೂಡಿಕೆದಾರರ ಲಾಭದ ಪ್ರವೃತ್ತಿ:ಸೆನ್ಸೆಕ್ಸ್ 38,736.23ಕ್ಕೆ ಇಳಿಕೆ

ಮುಂಬೈ, ಜುಲೈ 12 (ಯುಎನ್‌ಐ) ಹೂಡಿಕೆದಾರರ ಲಾಭದ ಪ್ರವೃತ್ತಿ ಹಿನ್ನೆಲೆಯಲ್ಲಿ ಮುಂಬೈ ಷೇರು ವಿನಿಮಯ ಕೇಂದ್ರ (ಬಿಎಸ್‌ಇ) ಸೂಚ್ಯಂಕ, ಸೆನ್ಸೆಕ್ಸ್ ಶುಕ್ರವಾರ ಚಂಚಲ ವಹಿವಾಟಿನಲ್ಲಿ ದಿನದ ಅಂತ್ಯಕ್ಕೆ 86.88 ಅಂಕ ಕುಸಿದು 38,736.23ಕ್ಕೆ ಇಳಿದಿದೆ.
ರಾಷ್ಟ್ರೀಯ ಷೇರು ಪೇಟೆ (ಎನ್ಎಸ್ಇ) ಸೂಚ್ಯಂಕ ನಿಫ್ಟಿ ಸಹ 30.40 ಅಂಕ ಕುಸಿದು
11,552.50 ಕ್ಕೆ ತಲುಪಿದೆ.
ಗುರುವಾರ 266 ಅಂಕ ಏರಿಕೆ ಕಂಡಿದ್ದ ಸೆನ್ಸೆಕ್ಸ್, ಇಂದು ಬೆಳಗಿನ ವಹಿವಾಟಿನಲ್ಲಿ 118 ಅಂಕ ಏರಿಕೆ ಕಂಡು 38,941.10 ಕ್ಕೆ ತಲುಪಿತು. ಆದರೆ, ಆರಂಭಿಕ ಲಾಭವು ಮಧ್ಯಾಹ್ನದ ಅವಧಿಯ ತೀವ್ರ ಏರಿಳಿತದಿಂದ ಅಳಸಿ ಹೋಯಿತು.
ಸೆನ್ಸೆಕ್ಸ್ 39,021.84 ಹಾಗೂ 38,684.85 ರ ನಡುವೆ ಏರಿಳಿತ ಕಂಡಿತು. ಅಂತಿಮವಾಗಿ 86.88 ಅಂಕ ಇಳಿಕೆ ಕಂಡು 38,736.23 ಕ್ಕೆ ವಹಿವಾಟು ಕೊನೆಗೊಳಿಸಿತು.
ನಿಫ್ಟಿ ಗರಿಷ್ಠ ಮತ್ತು ಕನಿಷ್ಠ ಕ್ರಮವಾಗಿ.11,639.55ತ್ತು 11,538.60ರ ಮಟ್ಟದಲ್ಲಿತ್ತು.
ವಲಯ ಸೂಚ್ಯಂಕಗಳಾದ ಬಂಡವಾಳ ಸರಕು, ದೂರಸಂಪರ್ಕ, ಕೈಗಾರಿಕೆ, ಬ್ಯಾಂಕಿಗ್ ನ ಷೇರುಗಳ ಕುಸಿತವು ಸೆನ್ಸೆಕ್ಸ್ ಏರಿಕೆಗೆ ಅಡ್ಡಿಯಾಯಿತು. ಲೋಹ, ರಿಯಾಲ್ಟಿ, ತಂತ್ರಜ್ಞಾನ, ಮಾಹಿತಿ ತಂತ್ರಜ್ಞಾನ ಮತ್ತು ಆರೋಗ್ಯ ರಕ್ಷಣೆ ವಲಯಗಳ ಷೇರುಗಳ ಏರಿಕೆ ಸೆನ್ಸೆಕ್ಸ್ ಮತ್ತಷ್ಟು ಕುಸಿತವಾಗುವುದನ್ನು ತಡೆದಿದೆ ಎಂದು ಪೇಟೆಯ ಮಧ್ಯವರ್ಥಿಗಳು ತಿಳಿಸಿದ್ದಾರೆ.
ಬಿಎಸ್‌ಇನಲ್ಲಿ ಮಾರುಕಟ್ಟೆ ಗಾತ್ರ ಒಟ್ಟಾರೆ ಋಣಾತ್ಮಕವಾಗಿತ್ತು. 1,196 ಕಂಪೆನಿಗಳ ಷೇರುಗಳು ಏರಿಕೆ ಕಂಡರೆ, 1,252 ಕಂಪೆನಿಗಳ ಷೇರುಗಳು ಇಳಿಕೆ ಕಂಡಿವೆ. ಉಳಿದಂತೆ 146 ಕಂಪೆನಿಗಳ ಷೇರುಗಳು ಯಥಾಸ್ಥಿತಿಯಲ್ಲಿದ್ದವು.
ಸಾಗರೋತ್ತರದಲ್ಲಿ ಅಮೆರಿಕ ಫೆಡರಲ್‌ ರಿಸರ್ವ್ ಈ ತಿಂಗಳ ಕೊನೆಯಲ್ಲಿ ಬಡ್ಡಿ ದರಗಳನ್ನು ಕಡಿತಗೊಳಿಸುವ ನಿರೀಕ್ಷೆಯಿಂದ ಹೆಚ್ಚಿನ ಯೂರೋಪ್‌ ಮಾರುಕಟ್ಟೆಗಳು ಏರಿಕೆಯಲ್ಲಿ ವಹಿವಾಟು ನಡೆಸುತ್ತಿದ್ದರೆ, ಏಷ್ಯಾದ ಮಾರುಕಟ್ಟೆಗಳು ಮಿಶ್ರವಹಿವಾಟು ನಡೆಸಿವೆ.
ಯುಎನ್‌ಐ ಎಸ್‌ಎಲ್‌ಎಸ್‌ ಕೆವಿಆರ್ 1804